မြန်မာတပ်မတော်မှ တအာင်းပရဟိတပညာရေး ဘော်ဒါဆောင် TEC ကျောင်းကို ဝင်ရောက်စစ်ဆေး
ရှမ်းပြည်နယ်မြောက်ပိုင်း ကွတ်ခိုင်မြို့နယ် တအာင်းပရဟိတပညာရေး
ဘော်ဒါဆောင် TEC ကျောင်းကို မြန်မာ့တပ်မတော် တပ်မ (၉၉)မှ ၂၄ ရက် ညနေပိုင်း ၄နာရီခွဲအချိန်တွင် ပါဂျက်ရို ကားနှင့်ရောက်လာပြီး ဘော်ဒါဆောင်အတွင်း ဝင်ရောက်မွှေနှောက်ကာ တာဝန်ကျကျောင်းဆရာနှစ်ဦးကို ထိန်းသိမ်းစစ်ဆေးမေးမြန်း နေသည်ဟု သိရသည်။
ဘော်ဒါဆောင်တွင် တာဝန်ရှိကျောင်းဆရာ တစ်ဦးပြောပြချက်အရ“ ကျောင်းဆရာနှစ်ယောက်က ဘော်ဒါဆောင်ပြန်ကြည့်တဲ့အချိန် ဗမာစစ်သားတွေက အေဆာင်ထဲမှာ ပစ္စည်းတွေ မွှေနှောက်နေတယ်၊ သူတို့နှစ်ယောက်ရောက်လာတော့ သူတို့နှစ်ယောက်ကို ထိန်းချုပ်ပြီး စစ်ဆေးမေးမြန်းတယ်၊ ဖမ်းခံရတဲ့ ဆရာတစ်ယောက်က ကျနော်ဆီ ဖုန်းဆက်ပြီး ဖမ်းခံရတဲ့ အကြောင်းပြောပြတယ်” ဟုပြောသည်။
စစ်ဆေးမေးမြန်းခံရသည့် ကျောင်းဆရာနှစ်ဦးကို တအာင်းစာပေယဉ်ကျေးမူ ဥက္ကဌ နှင့် ဂရုဏာလူမူကူညီရေးအသင်းအဖွဲ့တို့ သွားရောက် ထောက်ခံပေးပြီးနောက် ပြန်လွှတ်ပေးခဲ့သည်။
“ဘာပစ္စည်းတွေ ပျောက်သွားလဲ ဆိုတာ သေချာ မသိရသေးဘူး၊ ပစ္စည်းတွေလဲ ပြန်မစစ်နိုင်သေးဘူး၊ တိုက်ပွဲကလည်း နေ့တိုင်းဆက်တိုက်ဖြစ်နေတော့ ကျနော်တို့ ဘာ်ဒါဆောင်က မလုံခြုံတဲ့အတွက်ကြောင့် ကွတ်ခိုင်မြို့တစ်နေရာမှာ ခိုလှုံနေရတယ် ”ကျောင်းဆရာမှ ဆက်ပြောသည်။
မြန်မာ့တပ်မတော်မှ ကျောင်းဆရာ နှစ်ဦးအား TNLA အဖွဲ့မှ လက်နက် ပစ္စည်းဖွက်ထားသည့် သတင်းကြားရသည့်အတွက် လာရောက် မွှေနှောက်ပြီး စစ်ဆေးမေးမြန်းရကြောင်း ဖြစ်သည်ဟု ပြောသည်။
တအာင်းပရဟိတပညာရေးဘော်ဒါဆောင် TEC ကျောင်းတွင် စစ်ဆေးမွှေနှောက်ပြီးနောက် မည်သည့် လက်နက်ပစ္စည်းများမှ မတွေ့ရသည့်အတွက် ပြန်လည် ထွက်ခွာသွားခဲ့သည်။
ကွတ်ခိုင်မြို့ရှိ TEC ဘော်ဒါဆောင်သည် တအာင်းကျောင်းသားနှင့် လူငယ်များ TSYUမှ ဦးစီးဖွင့်လှစ်သည့် ပညာရေးကျောင်းဖြစ်သည်။
